السيناريو الكوميدي الكامل: قرية “ماااااسي”
اللوحة : على اليمين بوابة فخمة مكتوب عليها MARASSI وجواها الأغنيا قاعدين على الشيزلونج بيشربوا كوكتيل وبيضحكوا، وعلى الشمال واقفين “حنفي و سعدية” الغلابة بهدوم مقطعة وشايلين يافطة من كرتونة مكتوب عليها “قرية مااااسي للغلابة” وجنبهم سبت طماطم بـ 5 جنيه!
المكان: قدام بوابة الساحل الشمالي.. الأمن واقف.. وميكروفون قناة تلفزيون.
المذيعة: معانا النهاردة المواطن حنفي والمواطنة سعدية جايين الساحل ليه؟
سعدية: (بتصرخ) جايين نطالب بحقنا! هو حلال لنادية الجارحي وحرام لسعدية الجارحي؟!
حنفي: يا أستاذة احنا بنطالب بقرية سياحية للغلابة.. أسوة بقرى الأغنياء!
المذيعة: يعني ايه أسوة؟
سعدية: يعني هما عندهم مراسي.. احنا عايزين مااااسي!
حنفي: آه.. من كتر المآسي اللي شفناها!
سعدية: هما عندهم هاسيندا.. احنا عايزين أحزاني-دا!
حنفي: هما عندهم دي-باي.. احنا عايزين دي-ون علينا!
المذيعة: طب وايه الخدمات اللي عايزينها في قرية ماااسي؟
سعدية: بصي يا حبيبتي.. اولاً البيسين.. احنا مش عايزين بيسين بكلور.. احنا عايزين ترعة بميه ساقعة وفيها بطتين!
حنفي: والموج ميبقاش عالي عشان سعدية مبتعرفش تعوم.. بتغرق في طبق الكشري!
سعدية: اخرس!.. تاني حاجة.. بدل الجولف كار.. عايزين كارو بحمار.. الحمار يبقى GPS.. هو حافظ الطريق!
حنفي: وتالت حاجة.. بدل الـ Private Beach.. عايزين الـ Public Bhdala Beach.. يعني الشط كله بهدلة!
سعدية: والشاليه بدل ما يبقى Sea View.. يبقى عندنا Zبالة View وبرضو منظر طبيعي!
المذيعة: طب والأمن والخصوصية؟
حنفي: الأمن عندنا هيبقى الحاج سيد بخرزانة.. اللي يعدي من قدامه يقوله: رايح فين يا خلبوص؟
سعدية: والخصوصية؟ احنا هنقعد كلنا في شمسية واحدة مقطعة.. خصوصية ايه يا مدام.. احنا بنغير لبعض البامبرز للعيال على الشط!
فرد الأمن بتاع مراسي: (يقاطع) يلا يا جماعة من هنا.. دي قرية للصفوة بس!
سعدية: صفوة ايه يا خويا؟ ده انا شايفة جوه واحد صفوته خلصت من القعدة في الشمس!
حنفي: بقولك ايه يا باشا.. دخلنا بس نشم شوية يود.. صدرنا بايظ من عوادم الميكروباص!
سعدية: ده انا جايبة معايا كيس جوافة للمصيف كله.. هنقسمه!
حنفي: (يبص جوه) الله.. شايف يا سعدية؟ الأغنيا بياكلوا سوشي!
سعدية: سوشي ايه يا حنفي.. ده احنا لو كلنا سوشي بطننا هتعمل سوشيال ميديا!
حنفي: يا سعادة الباشا.. ابنوا لنا قرية ماااسي.. وحياة عيالكم.. هنبقى سياح زيهم.. هنلبس عوامة البطة ونتصور!
سعدية: وهنقول كمان: Good Morning يا خالتي ام سعيد! بدل Good Morning Marassi!
المذيعة: (بتضحك) رسالتكم وصلت.. قرية ماااسي للغلابة.. قريباً في الساحل الطيب!