بقلم : على خليل

—–

(١)

يا إبراهيم، فلتصمت أنت.

أنت اللي بقالك 20 سنة بتشتغل على مشروع واحد: تحويل أي سؤال طبيعي لمحاولة تفجير.
تسأل عن “مسيحيين في المنتخب”؟ مش عشانك مهتم بالكورة.
أنت عارف إن السؤال ده مالوش إجابة غير اللي أي عيل صغير عارفها: الموهبة بتختار اللاعب.
بس أنت مش عايز إجابة.. أنت عايز خناقة.

*دي شغلتك.*

تروح ترمي حجر في المية الراكدة وتستنى الناس تتخانق، وبعدين تطلع تعمل فيها الحكم اللي زعلان على البلد.
تزرع الشوك وبعدين تشتكي من الدم.

لما تقول “بيتساءل إبراهيم عيسى عن سبب عدم وجود لاعبين مسيحيين”، أنت مش بتدور على حقيقة.
أنت بتبني قضية من الهوا عشان تقول: شوفوا، فيه تفرقة.
مع إن التفرقة الوحيدة اللي موجودة هي في دماغك وفي البيزنس بتاعك.

*الكلام اللي أنت كاتبه ده مش وطنية.. ده استهبال سياسي.*

1. *أنت بترد على سؤال أنت اللي اخترعته.*
مين قال إن حد استبعد لاعب مسيحي بسبب دينه؟ هات اسم واحد.
مفيش.
يبقى أنت بتعمل مشكلة وهمية، وتحلها بخطاب رنان، وتستنى التصفيق. ده اسمه دجل، مش صحافة.

2. *بتحول الانتماء لمزايدة.*

“جميعاً مسلم ومسيحي يفخر بمجدي يعقوب .. ” والضابط زكى يوسف وتُعد قصته من أبرز الأمثلة على أن نصر اكتوبر كان ثمرة جهود جميع المصريين، مسلمين ومسيحيين، دون تمييز، وأن الكفاءة والإخلاص للوطن هما الأساس..
آه بنفتخر. وبنفتخر كمان بمحمد صلاح، وحازم إمام، وأبو تريكة.
عارف ليه؟
لأننا مش أغبيا زيك عشان نجزأ الفخر على حسب الدين.
إحنا بنفتخر باللي بيرفع اسم مصر، وأنت بتفتخر باللي يفتحلك سكة خناقة.

3. *”مصر للمصريين”

بتقولها وانت أكتر واحد بتقسم المصريين.*
كل مرة بتفتح بقك، بتقسم البلد نصين: مسلم ومسيحي، شعب وسلطة، متنورين ومتخلفين.
أنت مش بتنور.. أنت بتولع.
ولو ولعت، أول واحد هيتحرق هو اللي بيوزع البنزين ويقول أنا بطفيها.

*اسمع يا إبراهيم:*

المنتخب المصري مفيهوش كوتة مسيحي ولا كوتة مسلم.
فيه 11 لاعب بيجروا ورا كورة.
اللي شايف غير كده يبقى عنده مشكلة في عينه، أو في نيته.

والصحفي اللي دوره يفتش في بطايق اللعيبة بدل ما يفتش في أداء الوزير والمدرب،
ده مش صحفي.. ده مخبر فتنة بدرجة محر.

فلتصمت أنت يا اللي بتزرع الشوك،
عشان البلد دي تعبت من شوكك، ومن خطبك، ومن دور “المفكر الحر” اللي أنت لابسه بالمقلوب.

مصر مش محتاجة حد يقسمها عشان يعيش.
مصر محتاجة اللي يجمعها

وأن متلمتش معانا اللي يلمك؟!