أ/شيماء الشاعر أخصائية تخاطب وتعديل سلوك : ازاى أنمى مهارات التركيز والانتباه والادراك البصري لإبنى؟
كتير امهات بتشتكي ان اطفالها مش بتعرف تنقل من على السبورة وان الكلام اللي بينقلوه مالوش معنى وانه طلاسم غير مفهومة او انه منقلش من الاساس اي حاجة والمعلمة مسحت السبورة بعد فترة وبالتالي مكتبش حاجة وبالتالي الأم معرفتش ايه اللي اخده او ايه الواجب وتبدأ رحلة جروبات الواتس اللي الأم مشتركة عليها علشان تعرف اخدوا واجب ايه النهاردة طب مين خطه حلو ونقل من على السبورة علشان يدي باقي الولاد وهكذا وهكذا من مواقف بيتعرض لها الطفل والأم وحالة الحزن اللي بتصيب الأم لما تلاقي في اطفال كتر نقلوا من على البورد وابنها لاء طب ليه وتبقى محتارة مش عارفه تعمل ايه
طب يا ماما لازم تاخدي بالك في الأول ان النقل من على السبورة دي مهارة , مهارة قد تكون موجودة عند الطفل بشكل تلقائي ويقدر ينقل بشكل صحيح وقد لا تكون موجودة ومحتاجة تدريب للطفل علشان يقدر ينميها ويطورها ويقدر يلاحق زملاءه في الفصل
طب لو ماما ما اخدتش بالها ومدربتش الطفل ايه اللي حيحصل ان الطفل دا مع الوقت حيتحول لطفل صعوبات تعلم عنده مشكلة لأن المهارة الغير موجودة عنده او موجودة بشكل ضغيف محتاجة تتنمى وتتطور وماما مش هنا لسه مش واخدة بالها ان ضعف المهارة دا ناشئ اصلا من ان الطفل عنده خلل قد يكون ضعيف او متوسط أو شديد في مهارات الادراك والانتباه البصري وان الخلل في المهارات الأساسية للادراك والانتباه على طول يحدفنا على صعوبات التعلم من صعوبات قراءة لصعوبات كتابة وغيرها من باقي صعوبات التعلم اللي بيقابلها الاطفال في سنوات عمرهم الدراسية الأولى
امتى تتبلور المشكلة وتظهر بشكل كبير مش بسيط زي ما كانت قبل كده وماما مش واحدة بالها تبدأ عند دخول الطفل الصف الرابع الابتدائي او قبل كده كمان الطفل يرجع ناسي مش فاكر اخد ايه النهاردة يرجع مش كاتب حاجة او كاتب كلام مش مفهوم او في حاجات كتير ناقصة منه
مع كثافة المواد على الطفل في الصف الرابع تبدأ تظهر المشكلات بشكل اوضح وتبدأ رحلة الطفل مع الدروس الخصوصية ان مكانش قبل كدة كمان وبرضه مفيش فايدة
يا ماما ماهو مفيش فايدة علشان اساس المشكلة نفسه متحلش المهارة لسه ضعيفة او مش موجودة عند الطفل ومهما حديله من واجبات ودروس هو مش قادر يلاحق كل دا لانه ضعيف كأنك بالظبط بتطلب من طفل مبيعرفش يمشي او لسه بيتسند انه يدخل سباق جري مع اطفال بتجري بقالها سنين طبعا حيفشل وحيحس باهتزاز ثقته بنفسه ونبدأ ندخل في مشاكل نفسية من احساس الطفل بالعجز والدونية امام الآخرين غير احساسه بأنه كم مهمل في الفصل ومش قادر يدخل في الحالة التنافسية اللي فيها باقي الاطفال وهنا نلاقي اما انه يصبح طفل عدواني علشان يلفت النظر او طفل انطوائي مستسلم لضعفه مع مشاكل كل واحد منهم
ليه ما نعالح المشكلة من اساسها وندرب الطفل على مهارات النقل من السبورة وكمان هي في الاساس مهارات تدريب الانتباه والادراك البصري
تعالوا نشوف مع بعض مجموعة من التدريبات اللي اختارتها علشان تكون جزء اول لتدريبات النقل من على السبورة وتقوية الانتباه والادراك البصريولينا اجزاء تانية كمان حجمعلكم فيها اكبر قدر من تدريبات مهارة النقل من على السبورة كل اللي عليكم انكم تطبعوها وتبدأو تشتغلوا فيها مع الأطفال ونبدأ بالبسيط وبعد كدة نوصل للمتوسط والاصعبالتدريبات ملائمة لجميع الأعمار ولجميع الطلاب لتنمية مهارات الطفل التركيز والانتباه والادراك البصري
