ينفع كده ؟! بذمتكم – شعر – احمد الصارم
بلاش ترمي… هموم الكون ع كتافي
وأنا حافي…وشايل هم فوق همي
وليه شيفاني متعافي
وأنا اضعف من النسمة
وأنا أخري يدوب كلمة
يدوب بتحامي ف زعيقي
نشف ريقي
من التهويل من التبرير من التكسير
من النومة ع دمعة
من القومة ع دمعة
ده حتي اجازتي يوم جمعة
بتيجي عليا بالتكدير
بخاف اسرح لتبقي التهمة بالنية
وأنا لا حول ولا ليا
أنا عايش مع العايشين
بنتفرج ع العايشين
بنتمنى …مجرد يعني أمنية
عشان خاطري
بلاش ع ضعفي تستقوي
وتلوي بأسوة ف دراعي
تعضي بجد ف صباعي
لا أنا (يوسف) ولا (لاوي)
ولا عندي عصا (موسي)
ولا حاوي……!!
أنا عنوان ع الهامش…ف كشكولك
ومني ساعات بيشكولك
عشان بصرخ…وصوتي نشاذ كده بيزعج
وأنا محبوس ف أفلامهم ف برامجهم
ف أغنية يغنوها
ده أنا المكفوف وأنا الأطرش وأنا الأعرج
ومن جوف العذاب بخرج
وعارف إنهم عايشين
وعارف إني أنا منسي
وعارف إني بشكي لطوب
ومستني السميع (يفرج) ..