لدينا رجال أعمال استفادوا من البلد بكل الطرق المشروعة الغير مشروعه ليه ميدفعوش للبلد حق استغلال المواطن وثروات البلد في صورة ضريبة تحت مسمي ضريبة الاستفادة من البلد ولا هما فالحين يدفعوا للأندية علشان يبقي مشهورين وبس ويا ريت حتي ديه المواطن بيستفيد منها لان الأندية قاصرة عليهم وعلي الحبايب ..خدوا من دول وادعموا الشعب كفاية ظلم حرام.
هو رجل الأعمال ده ولا ده عمل ايه للبلد فيهم حد فكر يتبرع بثمن خمس ست طائرات للجيش مثلاً فيهم حد فكر يبني معسكرات الجيش أو الشرطة ..فيهم حد فكر ينشئ مستشفي لوجه الله لعلاج الفقراء فيهم حد لاسمح الله بني مدرسة او اتنين وقال هدية للشعب الغلبان فيهم حد راح وقال هابني مصنع لتشغيل الشباب الصاعد بدل التنطع علي المقاهي اللي صحابها أيضاً رجال أعمال فيهم حد لا قدر الله فكر إنه يقول اساعد علي كشف الجريمة واحط في الشوارع الرئيسية كاميرات كشف ..لا لا لا..هما بس بيفكروا ازاي ياخدوا من البلد ديه كل حاجة ويمصوا دم المواطن الغلبان بيشغله عبد عنده وطبعا العبد ميقدرش حتي يرفع عينه في وش سيده .
نعم لدينا الآن في مصر طبقة العبيد ..العبيد اللي عايزة تعيش فتتحمل كل ألوان وصنوف العذاب وليس لها حق التالم فهم عبيد ..ولدينا أسياد نشروا الفساد والرشوة واستغلال النفوذ ليربوا مالهم ..نشروا الرشوة بزعم إنهاء المصالح ..ونشروا استغلال النفوذ بزعم هو كده الكبير لازم يأمر ويطاع ..نشروا كل انواع الفساد وفي الاخر الدولة بتطبطب عليهم ارحمونا بقي يرحمكم الله.
