في ظل مكافحة كل ما هو ضار بالمجتمع وفي ظل إنشاء أكبر شبكة طرق ..وفي ظل إقامة مجتمعات عمرانية كظهير لتلك الطرق ..وفي ظل محاولة السيطرة علي كل ما يخل بأمن الطرق ..لو عددت أحنا عايزين نقول إيه ..يبقي كده أنا عايزة مجلد ..لذلك هاختصر وأقول ..لدنيا نزيف مالي للمواطن لا يصب إلا في مصلحة الموعودين فقط ..والمضار عادي هو المواطن الغلبان .
نشرح ونقول ..من ضمن ما يتم الاستحواذ عليه من المواطن ..مش عايزة استعمل لفظ آخر هو ..حقيبة الاسعافات الأولية التي يشترطها المرور اللي هو مش مستفيد منها اي حاجة علشان الناس اللي بتقعد للساقطه اللقطة تبقي عارفة كويس المرور مبيدخلش اجيبها منين ولا إزاي ..اه .. المهم نرجع للشنطة ديه ولا ليها مئة لأزمة أصلا لأنه وضع حقيبة الاسعافات الأولية لابد أن تكون في مكان بلغة الطب بارد.. وطبعاً احنا تحولنا لجو صحراوي بتسبب العربية ترجع تلاقيها فرن .. ما علينا يعني كده الشنطة باللي فيها هتفسد بعد أيام ..طيب خلاص عرفنا أن الشنطة باظت.
الأهم لا قدر الله في حالات الطوارئ فلا يوجد اي نفع لتلك الحقيبة ..ما علينا نسيب ده كمان .. الحوادث لا قدر الله في الطرق مش محتاجة حته شنطة فيها شاش وقطن ومرهم حروق دية محتاجة اكتر من كده بكتير..اه ..كده بقي نجي للكتير اللي محتاج له رواد الطريق بدل من الشنطة اللي لا تسمن ولا تغني من جوع ..اه ..محتاج إيه بقي.. محتاج سيارات إسعاف مجهزة بالكامل ..محتاج وحدات علاجية لإسعافه رواد الطريق بواسطة متخصص ..محتاج .. إني أبقي ماشي علي الطريق مطمئن ان لو لا قدر الله شيء عارض هلاقي منقذ متخصص خاصة في الطرق الطولية والمسافات البعيدة ..اه ..يبقي احنا نفكر شوية وبدل من شنطة ادفع فيها 150جنية وتفسد من الحر.. ولا استطيع استخدامها.
أدفع خمسين جنية موجهة لوزارة الصحة تحت بند دعم مرفق الإسعاف يعني توجهه كلها للاسعاف واعمل بها ايه.. واقول لك أشتري بها سيارات إسعاف مجهزة أنشرها في الطرق السريعة وأنشئ وحدات صحية لأطباء متخصصين ومجهزة لاعلي مستوي ..وبكده أنا ساهمت في إنقاذ حياة الإنسان ..وكمان شغلت أطباء وممرضين ومسعفيين يعني ساهمت في علاج البطالة ..والأهم إني أنقذت إنسان ربما يموت اذا انتظر قدوم الإغاثة ..لاني هثبت العربيات دية كل كام كيلو ولتكن خمسة أو عشرة كيلو يبقي مش ده احسن من شنطة الإسعاف اللي أصلا بيستفيد منها تجار الشنطة فقط ..بجد كفانا تفكير في إثراء مجموعة معينة علي حساب الشعب وبالتشريعات البرلمانية.
الناس غلابة ومش مستحمله حاجة ..للعلم الشنطة ديه من 2008 واتحدي أن يكون استفاد منها أحد ..فكروا شوية لصالح المواطن وساعدوه بتخفيف العبء بتوجيه ما يتم انفاقه في الهواء إلي ما يفيد المواطن ..وهذه دعوة اتمني أن يتبناها السيد الرئيس عبد الفتاح السيسي لدعم الطرق السريعة والتي أصبحت تضاهي الطرق في بلاد العم سام .
انتصار النمر
